නිරිතදිග බෙංගාල බොක්ක සහ ලංකාවේ මුහුදු තීරය ආශ්‍රිතව පැන නැගුනු දිට්වා සුළි කුණාටුව තවදුරටත් රෞද්‍ර වෙමින් උතුරු දෙසට ගමන්කරන බවත් එහි ප්‍රතිපලය ලෙස රටපුරා අධික වැසි තත්ත්වයක් සහ වේගවත් සුලං ඇතිවිය හැකි බවත් කාලගුණ විද්‍යා දෙපාර්තමේන්තුව අවධාරණය කරයි.
දිට්වා සුළගේ බලපෑම හේතුවෙන් උතුර, උතුරු මැද,මධ්‍යම සහ වයඹ පළාතත් සබරගමුව සහ බස්නාහිර පළාතත්, බදුල්ල සහ මඩකළපුව දිස්ත්‍රික්කයේ ප්‍රදේශ ගනනාවකට ත්‍රි,මලය දිස්ත්‍රික්කයේ ඇතැම් ප්‍රදේශවලට මි.මී.150 ඉක්මවූ ඉතා තද වැසි ඇතිවිය හැකි බවත් රටපුරා අනෙකුත් ප්‍රදේශවල මි.මී.100 ඉක්මවූ තද වැසි ඇතිවිය හැකිබවත් එම වාර්තාව මගින් අනාවරණය කරයි.
රටපුරා බොහෝ ප්‍රදේශවල පැ. කි. මී. 60-70 දක්වා වන ඉතා තද සුලං මෙන්ම පැ.කි.මී.80 දක්වා වූ ප්‍රහාරාත්මක සුලං ඇතිවිය හැකි බව ඔවුන් පෙන්වා දෙති.
පුත්තලම සිට කොළඹ, ගාල්ල, හම්බන්තොට, මඩකලපුව සහ ත්‍රි,මලය,කන්කසන්තුරය දක්වා වෙරළ ඔබ්බෙන් වන මුහුදු තීරය මුහුදු රළ උස මීටර් 3.0 – 4.0 දක්වා ඉහළයාමේ අවධානමෙන් පවතින බැවින් එම ප්‍රදේශවල මුහුදු රළ ගොඩබිමට පැමිණීමේ අවධානමක් පවතින බවද කාලගුණ විද්‍යා දෙපාර්තමේන්තුව අවධාරණය කරයි.
මේ අතර අවධානම් කලාපවල ජීවත්වන සියලුම ජනතාව නිරතුරුවම විමසිල්ලෙන් පසුවන ලෙසත් ඇතිවිය හැකි අනතුරු වලින් ආරක්ෂා වීමට අවශ්‍ය කඩිනම් පියවර ගන්නා ලෙසත් අනතුරු සංඥා නොතකා සිටීමෙන් ජීවිත අවධානම් නොගන්න ලෙසත් ආපදා කළමණාකරණ මධ්‍යස්ථානය දැණුම් දෙයි.
ගොඩබිම ප්‍රදේශවල සිදුවිය හැකි හානි ලෙස ගංගා ආශිත පහත්බිම්වල ජීවත්වන ජනතාව ගංවතුරෙන් සිදුවිය හැකි අවධානම මෙන්ම කදුකර ප්‍රදේශවල සහ බෑවුම් ප්‍රදේශවල ජීවත්වන ජනතාව නායයෑම නිසාවන අවධානමට ලක්වන බවත් ඒ පිලිබදව අවධානයෙන් සිටින ලෙසත් ආපදා කලමණාකරණ මධ්‍යස්ථානය දැනුම්දෙයි.
එසේම මුහුදු බඩ ප්‍රදේශවල ජීවත්වන ජනතාව අධික සුළං මෙන්ම මුහුදුරළ ඉහළයාම නිසා සිදුවන අනතුරුවලට ලක්විය හැකි බවත් එමනිසා තාවකාලික නිවාසවල ජීවත්වන ජනතාව ආරක්ෂිත ස්ථාන වෙත ගමන්කරන ලෙසත් එසේම එම ප්‍රදේශවල ජීවත්වන අනෙකුත් ජනතාව නිවාස තුලට වී සිටින ලෙසත් දැණුම්දෙයි.
එසේම රටපුරා සියලු ජනතාව අයහපත් කාලගුණය නිසා වන පරිසරයේ සිදුවන වෙනස්වීම් කෙරේ අවධානය යොමුකරන ලෙසද විශේෂන්ම ගස්කඩාවැටීම් විදුලිරැහැන් වලින් ඇදවැටීම නිසා ඇතිවන අනතුරු කෙරේ අවධානය යොමු කරන ලෙසත් එසේම ගිගුරුම් සහිත වැසි සහිත අවස්ථාවලදී රැහැන් දුරකතන, විදුලි උපකරණ භාවිතයෙන් වැලකීම මහමාර්ග වල රිය පදවන විට අවධානයෙන් ගමන් කිරීම මෙන්ම අත්‍යවශ්‍ය කටයුත්තකදී හැරුණු විට ගමන් බිමන් යාම සිදු නොකරන ලෙසත් ඔවුන් දැනුම් දෙති, එසේම නැවත දැනුම්දෙනතුරු රට වටා ගැඹුරු හෝ නොගැඹුරු මුහුදුතීරයේ ධීවර කටයුතු සහ නාවක කටයුතු වලින් වැලකීසිටින ලෙසත් දැණුම් දෙයි.
හදිසි අවස්ථාවකදී ආපදා කලමණාකරණ මධ්‍යස්ථානය අමතන ලෙසත් ඒ සදහා 117 දුරකතනය අමතන ලෙසත් ඔවුන් දැනුම් දෙති.